كيفية اداء العمرة كاملة وكيفية عمل عمرة يومية كل يوم عمرة معقولة وانتي ببيتك

قبل ان ابدأ اعلموا ان العمرة الى العمرة ورمضان الى رمضان مكفرات لما بينهن اذا اجتنبت الكبائر
ايضا بامكان كل واحد وواحدة يعمل عمرة كل يوم بس لان الموضوع صعب محدش هيقدر يعملها كل يوم الا من رحم الله بتقول كل يوم عمرة ايه ايوه كل يوم بس صعب طب ازاي وانا بمصر وانا بسوريا وانا بالمغرب وانا بليبيبا وانا بباكستان ايوه تقدر تعمل عمرة كل يوم ازاي
فقد ثبت في سنن الترمذي بإسناد صحيح عن أنس رضي الله عنه أن النبي صلى الله عليه وسلم قال:من صلى الفجر في جماعة، ثم قعد يذكر الله تعالى حتى تطلع الشمس، ثم صلى ركعتين، كانت له كأجر حجة وعمرة تامة تامة تامة .
فهذا ما ورد في فضل صلاة الفجر في الجماعة ثم الجلوس إلى شروق الشمس وصلاة ركعتين.
وظاهر هذا الحديث العموم لكل من صلى الصبح في جماعة وجلس الجلوس المذكور ثم صلى الركعتين. وقال الشيخ ابن باز رضي الله عنه انه حديث فيه نظر لكنه حسن من هذا الوجه لوروده كثير على العموم ونحن نحسن الظن في الله ان يحتسبها عمرة وطبعا الذكر بقراءة القرآن والتسبيح والتحميد والتهليل يعني مش لازم نفضل نقول سبحان الله والحمد لله ولا اله الا الله والله اكبر على طول لا ممكن نقرأ القران ممكن ندعو الله ممكن نصلي على النبي لحد متبدأ الشمس تطلع نصلي ركعتي الضحى كان لنا اجر عمرة تامة تامة وطبعا لانه صعب فكان اجر عمرة يلا كل واحدة تحاول تعمل عمرة كل شهر مرة بلاش كل اسبوع وهيه قاعدة ببيتها تصحي جوزها وولادها وتصلي الفجر جماعة معاهم وتفضل قاعدة مكانها تذكر الله وتسبح وتحمد حتى تطلع الشمس يكون لها عمرة تامة .

نبدا في كيفية اداء المرة عليها بصي ياستي اول حاجة لازم تميزي بين انتي هتسافري ان شاء الله بالطائرة ام بالباص وهل نزولك هيكون على المدينة الاول وبعدين تروحي العمرة ولا هتروحي العمرة الاول وبعدين تزوري المدينة عموما في حالة سفرك بالطائرة ونزولك مكة اولا يعني تعملي العمرة الاول انصحك تلبس ملابس الاحرام بالبيت بمعنى بمصر ده في حالة سفرك بالطائرة ياريت تلبس الاحرام بالبيت وطبعا تكون مقلم اظافرك ومتخذ كل احتياطات النظافة وبعدين تلبس اللبس الي انت هتععمي بيه العمرة وهوه أي لبس مش شرط ابيض ولا اسود بالنسبة للمرأة والا يكون مخيط او فيه خيط بالنسبة للرجل وقبل متلبس الاحرام حط الطيب على جسمك كله بالحمام قبل متلبس خالص وبعد كده لف جزء من الاحرام على وسطك والثاني خليه على كتفك ولا تبين الكتف الا عند الكعبة المشرفة بس المهم بعد متلبس الاحرام مش لازم تدخل بالنسك بمعنى متنويش الدخول بالنسك اول متلبس انما بعد الطائرة متقلع بيكي من القاهرة ان شاء الله ابدأ الدخول بالنسك وده لسببين
1- ان المفروض الطيار اول ميوصل على الميقات بينوه بس ممكن ينس وبالتالي هيكون عليك دم وعشان كده خد احتياط وانوي الدخول بالنسك من اول ركوبك الطائرة .
2- السبب الثاني ان ممكن الواحد ينوي الدخول من النسك بس كده هيكون عليه قيود كبيرة وثبت بالتاريخ ان المتقي بالله نوى الدخول بالنسك من بغداد شوفوا بقة فضل اد ايه محرم بالحج من اول بغداد لمكة في ايام مش كان فيه باص ولا طائرة ولا أي حاجة يعني ممكن تنوي الدخول بالنسك بس لازم تكوني تمر على الميقات وانتي ناوي العمرة يعني ممكن قبلها والافضل طبعا من نفس المكان .
افرضي لاقدر الله دخلتي جده ومش دخلتي بالنسك يبقى عليكي دم لازم تدبحيه وتفرقيه على فقراء الحرم وعشان الاطمئنان والامان اول متركبي الطائرة تخشي تتوضاي وتنوي الدخول بالنسك
اما لو كنتي نازلة على المدينة الاول فالافضل انك تنوي بقلبك طبعا زيارة المدينة وتأجلي نية الدخول بالعمرة لحد متخلصي زيارة المدينة لانك هتحرمي من ميقات ذي الحليفة او مكان اسمه ابيار علي حاليا .

طيب لو كنتي بالباص يبقى الباص هيقف بيكي في مكان قريب من رابغ اسمه الجحفة وهناك تدخلي الحمام وتتوضاي وتنوي الدخول بالنسك وانا هقولك ازاي تكون النية

بصي حابة اقولك على حاجة كل حاجة تنوي تعمليها حتى الصلاة محلها القلب يعني مثلا مينفعش واحدة تدخل الصلاة تقول نويت اصلي صلاة الظهر الله اكبر لا انما النية محلها القلب فلا يصح التلفظ بها على اغلب الاقوال . الا في العمرة والحج لابد من التلفظ بالنية وجهرا يعني مش صوت عالي لا صوت تسمعي بيه نفسك وتبدأي الدخول بالنسك ونصيحة متدخليش بالنسك غير لما تخلصي وضوء وتصلي ركعتين سنة الوضوء او ركعتين تحية المسجد او مثلا صلاة فريضة ودي عشان تفضلي حرة نفسك قبل الاحرام .
طيب خلاص توضأنا ولو معاكي رجل اكيد هيعتمر كمان هيدخل الحمام يشطف وبعدين يعطر جسمه كله قبل ميلبس الاحرام يعطر جسمه ودي مهمة جدا يعني مينفعش يعطر جسمه بعد ميلبس الاحرام ثم بعد كده يلبس الاحرام هتقولي طيب هيفضل حاجة من العطر هقولك لو الاحرام لزق فيه رائحة عطره قبل اللبس لا غبار عليه بالعكس مستحب لكن لو تعطر بعد ملبس الاحرام هذا خطأ ومنافي للسنة يبقى يطيب نفسه قبل لبس الاحرام .ان شالله يارب يغرق نفسه في بحر طيب وعطر بس قبل لبس الاحرام ( هااااااااام جدا جدا )
بعد كده يلبس الاحرام ويروح يصلي ركعتين برضه وبعدين انتي وهوه كده جنب الباص قوليله تعالى ننوي الدخول بالنسك .
( لبيك اللهم عمرة فوفقها لي ويسرها لي وان حبسني حابس فمحلي حيث حبستني )
يعني ايه الكلام ده يعني يارب لو لاقدر الله حاجة حاشتني يبقى تقبل مني عمرتي في المكان اللي هيحصل لي حاجة فيه بعيد الشر وحابة اقولك حصلت فعلا للرسول صلى الله عليه وسلم لما خرجوا في صلح الحديبية وخلاص اجتمع المشركون وفاوضوا الرسول كده حبسوه عن مكة كانوا محرمين كلهم للعمرة حتى ان سيد الاحابيش يعني كبير اهل الحبشة بمكة قال يامعشر قريش خلوا بين صاحبكم والكعبة والله وجدت الابل في اعقالها اكلت وبرها ) يعني الابل هتموت بسبب الحبس طبعا ابل الذبح المهم اتفقوا على الصلح على ان الرسول يرجع فلما حب يفك احرامه نادى في المهاجرين والانصار حلوا احرامكم محدش رضي يسمع كلامه ايوه باللفظ محدش سمع كلامه صلى الله عليه وسلم فدخل الرسول على السيدة ام سلمة وقال هلك الناس يا ام سلمة هلك الناس فسألته وشوفوا حكمة المرأة اايوه ممكن تغلب الرجل انا اقول رجل لان الرسول اذا تصرف في امور الدنيا كان فيه ناس اصوب منه في الراي دلوقتي تطلع عضوة تسيب الموضوع كله وتمسك بالكلمة دي المهم قالت المرأة يارسول الله اخرج ولا تكلم الناس ونادي الحلاق يحلق لك شعرك فيرى الناس هذا فيحلقون ففرح رسول الله ودعا لها ثم خرج ونادى الحلاق حتى ان كتب السيرة تقول كان الصحابة يرون الدم على جبهتم من غيظ من يحلق لاخيه يعني كل واحد بيعور الثاني من الغيظ انه مش هيعتمر . وحسبت لهم عمرة باذن الله .
معلشي هقولك على حاجة لو حاسة ان الموعد الحرج هيتناسب مع ميعاد سفرك مفيش مانع تاخدي حاجة تأجل نزولها مؤقتا لحين الانتهاء من العمرة وان شاء الله يكون مفيش حاجة .
المهم انتي قلتي النية ( لبيك اللهم عمرة فوفقها لي ويسرها لي وان حبسني حابس فمحلي حيث حبستني ) ثم تقولي لبيك اللهم لبيك لبيك لاشريك لك لبيك ان الحمد والنعمة لك والملك لاشريك لك طبعا تقوليها كده مع نفسك مترفعيش بها صوتك يعني سمعي نفسك كده بس الرجالة تعلي صوتها يعني لو معاكي ابوكي اخوكي زوجك افضلي قولي ليه لبي زعق فما يسمع التلبية شجر ولا حجر حتى يلبوا معكم باذن الله .
طيب انتي كده بدأتي الدخول بالنسك ايه محظورات الاحرام يعني فيه حاجات المفروض مش تعمليها اول متدخلي بالنسك
1- عدم قضم الاظافر الناس اللي عندها عادة انها تقضم اظافرها .
2- التحري بعدم نزول شعر الرأس زيادة عن اللزوم فيه ناس تحب تكحت اثناء التسريح ومش ضروري بعد متدخلي بالنسك لانها مدة بسيطة اوي اوي وبعديها اعملي اللي انتي عاوزاه .
3- عدم استعمال الصابون المعطر وده مهم لانه من الاخطاء الشائعة وبالنسبة للرجالة عدم تغطية شعر الراس يعني ميكونش الجو حار يروح حاطط الاحرام على راسه او مثلا الجو برد يروح متلفح بالاحرام من راسه ومكلفت فيه . لايجوز
4- عدم لبس المخيط بالنسبة للرجال يعني مينفعش واحد يروح لابس حاجة مخيطة مجسمة انما الحزام اجازه العلماء لانه ضرورة يحفظ الاغراض وان كان المفضل فيه حزام كباسين .
5- عدم قطع الشجر الناس الي هوايتها شد الشجر وورقه بعد الاحرام مينفعش يعني يفضل الا للضرورة وطبعا مش هتكونوا محتاجين ضرورة .
6- بالنسبة لمكة سواء كنتي محرمة او غير محرمة لا يعضد شوكها ولا يروع امنها ولا ينوى فيها بسوء
7- عدم الصيد وطبعا ده مش موجود دلوقتي وعدم النكاح انا بقول كده للاستفادة مش اكثر .
8- يجوز انك تتغطي ببطانية لو الجو برد ويجوز للرجل يتغطى ببطانية بس تحتها الاحرام حتى لو سقط الاحرام وهو نائم فلا غبار عليه ويجوز انك تتظللي بشمسية او خيمة كل دي بقوله للاستفاده مش اكثر .
المهم عرفتي محظورات الاحرام افضلي طول الطريق لبي وادعي واستغفري واذكري الله ولو نمتي مش مهم كله من اول دخولك بالنسك عبادة باذن الله طالما صفيت النية .
وصلتي مكة اول حاجة تعمليها ادخلي الحمام وتوضأي وضوءك للصلاة وكوني على طهارة سواء كنت رجل او امرأة وبعدين ادخلي من أي باب يعني مش لازم باب معين هتشوفي الكعبة المشرفة
يفضل انك تقولي ( اللهم زد هذا البيت تشريفا وتعظيما ) هتلاقي ناس بيبعو ا ادعية بلاش تشتري وادعي بالي يفتح ربنا عليكي بيه المهم لو معاكي بابا او اخوكي او أي حد خليه يروح حاطط الاحرام بطريقة تبين كتفه الايمن وده اسمه بالاسلام يضطبع ( الاضطباع ) .
ياترى فيه سبب لكده ايوه فيه سبب الرسول لما كان بالعمرة بتاعته كانوا داخلين مكة بعد غزوة خيبر فكان المشركين بيقولوا دي فرصة كبيرة هم تعبانين اوي اوي ولو قدرنا ننقض عليهم وهم بيطوفوا تكون فرصه لينا فنزل سيدنا جبريل على رسول الله وحذره فقال الرسول صلى الله عليه وسلم ( رحم الله رجلا رأى المشركين ضبعه ) يعني قوته وامرهم بالرمل في الثلاث اشواط الاولى من الطواف يعني زي كده الجري بالمحل عارفاه طبعا .
المهم انك اول متدخلي الحرم المكي وتشوفي الكعبة روحي على بداية الكعبة عند الحجر الاسود ومتزاحميش عليه بس شاوري عليه وقولي بسم الله الله اكبر وابدأي الطواف هتكون الكعبة على شمالك وتبدأي بالطواف حوالين الكعبة ادعي ربنا بكل اللي يفتح عليكي بيه كل حاجة تخطر على بالك افتكري امك وابوكي واخواتك وادعيلهم افتكري حال المسلمين واليتامى والارامل والمساكين وادعيلهم افتكري المسجد الاقصى وادعي بتحريره من ايدي اليهود افتكري الجنة والنار وادعي ربنا يدخلك هنا ويعافيكي من الثانية افتكري سكرات الموت وادعي ربنا يخففها عنك افتكري اللي عملتيه من ذنوب وادعي ربنا يغفرها لحد متلفي الكعبة كلها هتلاقي الجانب الاخير وده بيكون بين الحجر الاسود والركن اليماني الجهة الاخيرة من الكعبة ده افضلي كرري الدعاء
( ربنا آتنا بالدنيا حسنة وبالاخرة حسنة وقنا عذاب النار ) افضلي كرري فيه لحد متخلصي شوط كده ده شوط على كده 7 اشواط كل مرة توصلي للربع الاخير كرري الدعاء ده هوه ده الدعاء الوحيد المأثور عن النبي انه كان يقوله في عمرته وحجه وكان يدعو بما يشاء هو والصحابة الكرام .
وصلت كده
يبقى تبدأي ويستحسن تقولي مثلا اللهم زد هذا البيت تشريفا وتعظيما اللهم ان البيت بيتك والحرم حرمك والعبد عبدك وانا عبدك وابن عبدك ناصيتي بيدك ماضي في حكمك عدل في قضاءك نسالك بكل اسم هو لك سميت به نفسك او انزلته في كتابك او علمته احد من خلقك او استأثرت به في علم الغيب عندك ان تجعل القران الكريم ربيع قلوبنا ونور صدورنا وجلاء همومنا الى آخر الادعية ) بما يفتح الله عليكي به
خلصتي السبع اشواط
تصلي ركعتين خلف مقام ابراهيم ومتزاحميش يابنتي يعني بكل مكان بالمسجد تقدري تصلي طيب عاوزة تصيبي السنة كان الرسول قرأ بالركعة الاولى
قل يا ايها الكافرون وبالركعة الثانية ( قل هو الله احد )
صلي ركعتين خلصتي تقدري تشربي بكل وقت من ماء زمزم كل وقت وكل اوان اشربي منه اربعي زي مبيقولوا
بعد كده هتطلعي على الصفا تبداي بيها تقفي عليها وهنا مش شرط الطهارة بس يفضل اما الطواف على اصح الاقوال شرطه الطهارة تقفي وتبصي على الكعبة وتقولي الي هقولك عليه
( ان الصفا والمروة من شعائر الله فمن حج البيت او اعتمر فلا جناح عليه ان يطوف بهما ومن تطوع خيرا فان الله شاكر عليم ، ابدأ بما بدأ به الله ورسوله بسم الله الله اكبر ) وتبدأي تنزلي من الصفا وطبعا بقة كله مبلط دلوقتي يعني متخفيش تنزلي تقولي مثلا ( الله اكبر كبيرا والحمد لله كثيرا لا اله الا الله وحده صدق وعده ونصر عبده وهزم الاحزاب وحده ) ثم تبدأي بالدعاء بكل ما ترغبين به ولو استطولتي المدة عليكي اقراي قران وانتي بتسعي لحد مهتلاقي علمين يعني نور اخضر بالسقف ده اول علم وعلى بعد مثلا 200 متر العلم الثاني دي المسافة اللي كانت السيدة هاجر بتجري فيها من لهفتها على ابنها تشوف حد هنا او هنا يعني تنزل من الصفا تمشي لحد المكان ده تجري تتعب ترجع تمشي تاني لحد متطلع المروة وفضلت على كده
وعشان كده اصبحت سنة للرجال بس يعني الرجالة بس هيه الي ترمل بين العلمين لكن النساء تمشي عادي خالص خالص وتدعي طول منتي رايحة لحد متوصلي للمروة تتجهي للكعبة وتقولي بسم الله الله اكبر وتنزلي من على المروة لحد الصفا كده بقوا كام 2 يعني انتي رحتي من الصفا للمروة ادي شوط ونزلتي من المروة للصفا ادي شوط تاني يبقى انتي ابتديتي من الصفا وتنتهي فين بالمروة يكون معاكي مقص صغير تقصي مقدار انملة من شعر راسك انما لو معك راجل خليه يروح للحلاق يحلق ده افضل من التقصير وبكده تكون عمرتك انتهت وربنا يحفظك ويتقبل منك وكده تكوني خلصتي العمرة وربنا يتقبل منك باذن الله .
طيب انتي خلصتي صلي بقة بالحرم انوي الاعتكاف ولو نصف ساعة لانه سيكتب نيتك باذن الله واعلمي ان الركعة في الحرم بمائة الف ركعة والصلاة بمائة الف صلاة كما قال الحبيب محمد صلى الله عليه وسلم .
خلصتي وحابة تشوفي المسجد الحرام استشعري فيه كل حاجة بقة بعد كده يعني مثلا هتلاقي باب النبي ده الباب اللي دخل منه النبي لفك اشتباك الحجر وفيه باب العباس وفيه باب بني شيبة وفيه باب السلام الباب اللي دخل منه الرسول مكه بعد الفتح وفي حته اسمها التوسعة الي بره باب السلام بصي بعيد هتلاقي بيت صغير محوط ده كان بيت النبي صلى الله عليه وسلم على اصح الاقوال ولو عاوزة تلفي مكة فيه ب75 ريال يخدك عربية اجرة تلففك كل الاماكن وتقبل الله منك اختاه ومتنسنيش بالدعاء

مشكور يا اخ بستان السلام
موضوع مفيد
جزاك الله خيرا وجعله بميزان حسناتك

كيفية اداء العمرة كاملة وكيفية عمل عمرة يومية كل يوم عمرة معقولة وانتي ببيتك 724766

كيفية اداء العمرة كاملة وكيفية عمل عمرة يومية كل يوم عمرة معقولة وانتي ببيتك 724766

كيفية اداء العمرة كاملة وكيفية عمل عمرة يومية كل يوم عمرة معقولة وانتي ببيتك 141208

جزاك الله كل خير

جزاك الله خير وجعلة فى ميزان حسناتك

بااارك الله فيك
وجعلة في ميزان حسناااتك

» حصريااااااا اخبار مش معقولة غرييييييبة جدا
» خطوات مهمة لحياة يومية سليمة